jakov

Последование
Божественной литургии Святаго Апостола Иакова, Брата Божия и Первоиерарха Иерусалимскаго

В редакции иг. Силуана (Туманова)

Проскомидия, если бывает, совершается по обычаю, только девятая частица вынимается в честь св. ап. Иакова. Молитва проскомидии не читается, сосуды покрываются, но отпуст и каждение не совершается.

Если же проскомидия не совершается (что более подобает древней литургии), то на жертвеннике диаконом готовится дискос с просфорой и чаша с вином и водой. Иерей может надрезать копием просфору крестообразно (для удобства её последующего преломления), после чего все встают на своих местах у престола.

При закрытой завесе и вратах иерей читает тихо перед престолом молитву предначинательную:

Оскверненнаго грехами многими, не презри мене, Владыко Господи Боже наш. Се бо приступих к божественному сему и пренебесному Твоему таинству, не яко достоин, но взирая на Твою благостыню. Глас Ти пущаю: Боже, милостив буди мне грешному: согреших на небо и пред Тобою и несмь достоин воззрети на святую Твою сию и духовную трапезу, на нейже Единородный Твой Сын и Господь наш Иисус Христос, мною грешным и всякою скверною окаянным, тайно предлагается в жертву. Сего ради Тебе моление и благодарение приношу, еже ниспослати ми Духа Твоего Утешителя, укрепляющего мя к службе сей, и от Тебе возвещенный ми глас неосужденно проповедати людем сподоби, во Христе Иисусе Господе нашем, с нимже благословен еси, со Всесвятым и Благим, и Животворящим Твоим Духом, ныне и присно и во веки веков.

Все в алтаре тихо отвечают: Аминь.

Открываются завеса и Царские врата. Иерей перед престолом громко произносит предначинательный возглас (творя крест Евангелием):

Слава Отцу и Сыну и Святому Духу, Троичному и Единичному свету Божества, Сущаго в Троице Единаго и разделяемаго нераздельно. Троица бо едина Бог Вседержитель, Егоже славу небеса поведают, земля же Его владычество, море Его державу и всякая умная тварь величество проповедает. Яко тому подобает всякая слава, честь и держава, величие же и великолепие, ныне и присно и во веки веков.

Хор: Аминь.

Иерей громко читает вторую молитву:

Благодетелю и Царю веков, и всея твари Содетелю, приими приходящую Ти через Христа Твоего Церковь Твою. Каждому полезное исполни, приведи всех к совершенству, и достойны нас соделай благодати освящения твоего, соедини нас во Святую Твою Соборную и Апостольскую Церковь, которую стяжал еси Честною Кровию Единороднаго Сына Твоего, с Нимже благословен еси и препрославлен со Всесвятым и Благим, и Животворящим Твоим Духом, ныне и присно и во веки веков.

Хор: Аминь.

Диакон, лицом к народу: Господу помолимся.

Хор ничего не отвечает.

Иерей, кадя престол спереди трижды, громко читает молитву:

Боже, приемый Авелевы дары, Ноеву и Авраамову жертву, Аароново и Захариино кадило, приими и от рук нас грешных кадило сие во благоухание и во оставление грехов наших и всех людей твоих.
Яко благословен еси и подобает Тебе слава, Отцу и Сыну и Святому Духу, ныне и присно и во веки веков.

Хор: Аминь. и «Единородный Сыне…»

Совершается малый вход: из северных врат выходят пономари с подсвечниками и кадилом, затем диакон с книгой Апостола и священник с Евангелием, обходят по храму, останавливаются у амвона.

Иерей (тихо) читает молитву:

Боже Вседержителю, Великоимените Господи, давший нам вход во Святое Святых пришествием Единородного Твоего Сына, Господа же и Бога, и Спаса нашего Иисуса Христа, молим и просим Твою благостыню, страшась и трепещя, желая предстати святому твоему жертвеннику.

Низпосли на нас, Боже, благодать Твою благую, и освяти наша души и телеса, и духи и обрати помыслы наша ко благочестию, да в чистой совести принесем тебе дары, даяния, плоды, в истребление согрешений наших и во умилостивление за всех людей Твоих.

Возгласно: Благодатию и щедротами, и человеколюбием Единороднаго Твоего Сына, с Нимже благословен еси во веки веков.

Хор: Аминь.

Священники входят в алтарь, а диакон на амвоне (лицом к народу) произносит ектению:

В мире Господу помолимся.

Хор: Господи, помилуй.

О мире свыше и Божием человеколюбии и спасении душ наших, Господу помолимся.

О мире всего мира и единении всех святых Божиих Церквей, Господу помолимся.

О спасении и заступлении Святейшего Отца и архиепископа нашего …, об отце и протоиерее нашем …, о всем причте, зде начальствующих, учащих и учащихся и христолюбивых людех, Господу помолимся.

О оставлении грехов и прощении согрешений наших, еже избавитися нам от всякия скорби, гнева, беды и нужды и возстания врагов, Господу помолимся.
Пресвятую, пречистую, преславную, благословенную Владычицу нашу Богородицу и приснодеву Марию, святаго Иоанна, славнаго пророка, Предтечу и Крестителя, божественныя и всехвальныя апостолы, славныя пророки и добропобедныя мученики, и вся святыя и праведныя помянем, яко да молитвами их и предстательствы вси помилованы будем.

Иерей молится тайно:

Щедре и милостиве, долготерпеливе и многомилостиве и истинне Господи, призри от святаго жилища Твоего и услыши нас, молящихся Тебе, и избави нас от всякаго искушения диавольского и человеческаго, и не отстави от нас помощь Твою, ниже тягчайшего силы нашея наказания не наведи на нас. Не довольно бо сил наших побеждати противныя, Ты же силен еси, Господи, во еже спасати от всех противлений. Спаси нас, Боже, от бедствий мира сего по благости Твоей, яко да вшедше в чистой совести ко святому Твоему жертвеннику, блаженную и трисвятую песнь с пренебесными силами неосужденно вознесем Ти и, благоприятную и божественную совершив службу, сподобимся вечной жизни. Аминь.

Возглас: Яко Свят еси, Господи Боже наш, и во святых обитаеши и почиваеши, и Тебе славу и трисвятую песнь возсылаем, Отцу и Сыну и Святому Духу, ныне и присно и во веки веков.

Хор: Аминь. и Трисвятое.

Перед последним трисвятым диакон возглашает: Силы (или по греч. Динамис). 
По окончании пения иерей благословляет народ во святых вратах: Мир всем.

Хор: И духови твоему. Аллилуия (трижды).

Во время пения иерей восходит на Горнее место и садится по обычаю.
После окончания пения (и чтения паремии) чтец за амвоном возглашает: Чтение от иже ко Ефесеем послания святаго апостола Павла (или другой книги).

Диакон: Вонмем.

После чтения снова поется: Аллилуия.

Иерей читает (тайно) молитву:

Возсияй в сердцах наших, Человеколюбче Господи, разума нетленный свет, и мысленныя наша отверзи очи во евангельских Твоих проповеданий разумение. Вложи в нас и блаженных Твоих заповедей страх, да плотские похоти поправше, духовное жительство пройдем, вся, яже ко благоугождению Твоему и мудрствующе, и деюще.

По окончании пения возглашает диакон:

Востаните, с вниманием услышим Святаго Евангелия чтение.

Священник: Мир всем.

Хор: И духови твоему.

Иерей: Чтение от (имя) святаго Евангелия.

Диакон: Вонмем святому чтению.

И читает священник Евангелие во святых вратах, лицом к народу.

После чтения снова поют певцы: Аллилуия.

После чтения иерей произносит проповедь.

После проповеди хор поёт: Слава Тебе, Господи, слава Тебе.

Диакон (лицом к народу) произносит сугубую ектению:

Рцем вси: Господи, помилуй.

Хор: Господи, помилуй.

Господи Вседержителю, Пренебесне, Боже Отец наших, молимтися, услыши и помилуй.

Хор: Господи, помилуй.

О мире всего мира и единении всех святых Твоих Церквей, помолимся.

Хор: Господи, помилуй.

О спасении и заступлении Святейшаго Отца и Архиепископа нашего (имя правящего Архиерея)…, отца и протоиерея нашего …, всего причта, зде начальствующих, учащих и учащихся и христолюбивых людех, помолимся.

Хор: Господи, помилуй.

О еже избавитися нам от всякия скорби, гнева, беды и нужды, пленения, горькия смерти и беззаконий наших, помолимся.

Хор: Господи, помилуй.

О предстоящих людех, ожидающих от Тебе богатыя и великия милости, молим Тя, буди благоутробен и помилуй.

Здесь иерей, обратившись к людям, благословляет их, произнося в святые врата:

Спаси, Боже, люди Твоя и благослови достояние Твое.

Хор: Господи, помилуй.

Диакон: Призри на мир Твой милостию и щедротами.

Хор: Господи, помилуй.

Вознеси рог христианский, силою честнаго и животворящего Креста, молитвами Пречистыя, благословенныя Владычицы нашея Богородицы, Предтечи и апостолов Твоих, и всех святых Твоих, молим Тя, Многомилостиве Господи, услыши нас, молящихся Тебе, и помилуй.

Хор: Господи, помилуй. (трижды).

Иерей тайно читает молитву:

Боже, огласивый нас божественными и спасительными Твоими словесы, просвети души нас, грешных к восприятию преждечтеннаго, яко да не токмо слышатели явим себе духовных речений, но и творцы деяний благих, содержащия веру нелицемерну, живот незазорен, жительство неукорно, во Христе Иисусе, Господе нашем, с Нимже благословен еси, со Всесвятым и Благим, и Животворящим Твоим Духом, ныне и присно и во веки веков.

Возглас: Ты бо еси благовестие и просвещение, Спас и страж душ и телес наших, Боже, и Единородный Твой Сын, и Дух Твой Всесвятый, ныне и присно и во веки веков.

Хор: Аминь.

Диакон: Да внемлем усердне, миром Господу помолимся.

Хор: Господи, помилуй.

Иерей читает молитву тайно:

Владыко животворче и благих подателю, давый человеком блаженную надежду жизни вечныя, Господа нашего Иисуса Христа, сподоби нас, Блаже, во освящении и сию Ти божественную совершати службу, в наслаждении хотящего быти блаженства.

Разворачивает антиминс и возглашает:

Яко да под державою Твоею всегда храними и во свет истины путеводими, Тебе славу и благодарение возсылаем, Отцу и Сыну и Святому Духу, ныне и присно и во веки веков.

Хор: Аминь.

Диакон: Миром воспоим Христу: встаньте со трепетом вси.

Хор: Да молчит всякая плоть человеча и да стоит со страхом и трепетом, и ничтоже земное в себе да помышляет: Царь бо царствующих и Господь господствующих приходит заклатися и датися в снедь верным.

Иерей кадит алтарь, амвон и предстоящих как обычно, затем целует св. престол, омывает на амвоне руки, кланяется людям и отходит с диаконом к жертвеннику. Там дает диакону дискос, сам берет потир, и оба выходят на середину храма в предшествии свещеносцев и кадящего на сосуды пономаря, поминая живых и усопших.

Диакон возглашает: Всех вас да помянет Господь Бог, всегда ныне и присно и во веки веков.

Хор: Аминь.

Иерей и диакон идут к алтарю, на амвоне иерей произносит молитву предложения:

Боже, Боже наш, небесный хлеб, пищу всему миру, Господа нашего Иисуса Христа пославый Спаса и Избавителя, и Благодетеля, благословяща и освящающа нас. Сам благослови и предложение сие и приими в пренебесный Твой жертвенник.

Входит в алтарь и ставит сосуды на престоле (если сосуды были покрыты покровцами, здесь они снимаются), продолжает молитву:

Помяни, яко Благ и Человеколюбец, принесших, и ихже ради принесоша, и нас неосужденных сохрани во священнодействии святых Твоих Таин.

Яко святися и прославися всечестное и великолепое имя Твое, Отца и Сына и Святаго Духа, ныне и присно и во веки веков.

Хор: Аминь. Предходят же сему лицы ангельстии со всяким началом и властию, многоочитии херувимы и шестокрилатии серафими, лица закрывающе и вопиюще песнь: Аллилуиа.

Во время пения иерей кадит предложение, читая тайно молитву:

Владыко Вседержителю, Царю славы, ведый вся прежде бытия их, Сам прииди к нам, во святый час сей призывающим Тя, и избави нас от срама греховнаго, очисти наш ум и помышления от нечистых похотей и мирския прелести, и всякаго диавольскаго действа, и приими от рук нас грешных фимиам сей, якоже приял еси приношение Авелево и Ноево, и Аароново, и Самуилово, и всех святых Твоих, избавляя нас от всякаго деяния лукаваго, и спасая во еже всегда благоугождати и покланятися, и славити Тебе Отца, и Единороднаго Твоего Сына и Духа Твоего Всесвятаго, ныне и присно и во веки веков, аминь.

После пения Херувимской диакон выходит на солею и возглашает:

Премудрости Божией вонмем.

Все (или чтец) произносят Символ веры.

По окончании Символа диакон возглашает:

Станем добре. Миром Господу помолимся.

Хор: Господи, помилуй.

Иерей читает молитву (тайно):

Боже и Владыко всех, достойных нас соделай часа сего, недостойных, Человеколюбче, да очистившеся от всякаго коварства и лицемерия, соединимся друг другу союзом мира и любви, утвержденные Твоего богове-дения освящением, Единороднаго ради Твоего Сына Христа, с Нимже благословен еси, со Пресвятым и Благим, и Животворящим Твоим Духом ныне и присно и во веки веков.

Возглас: Яко Бог милости, любви, щедрот и человеколюбия еси, Ты и Единородный Твой Сын, и Дух Твой Всесвятый, ныне и присно и во веки веков.

Хор: Аминь.

Иерей: Мир всем.

Хор: И духови твоему.

Диакон: Возлюбим друг друга лобзанием святым.

Хор (на глас 7-й): Возлюблю Тя, Господи, крепосте моя, Господь утверждение и прибежище, и избавитель мой.

Иерей целует край дискоса, чаши и престол и приветствует сослужащих во время пения по обычаю в алтаре и, выходя на амвон, произносит:

Христос посреде нас

Все отвечают: И есть, и будет.

Диакон возглашает: Главы наша ко Господу приклоним.

Хор: Тебе, Господи.

Иерей (тайно): Едине Господи и Милостиве Боже! Приклонившим выя своя пред святым Твоим жертвенником и просящим у Тебе духовныя дары, ниспосли благодать Твою благую и благослови всех нас всяким благословением духовным и неотъемлемым, в вышних Живущий и Призирающий на смиренныя.

Возглас: Яко хвально и покланяемо, и препрославлено есть всесвятое имя Твое, Отца и Сына и Святаго Духа.

Хор: Аминь.

Диакон (обернувшись к востоку): Господи, благослови.

Иерей: Господь да благословит нас и да поспешит нам, и достойны да сотворит нас предстояния святаго Своего жертвенника и пришествия (здесь благословляет дискос) святаго Твоего Духа(благословляет чашу) Своею благодатию и человеколюбием, всегда, ныне и присно и во веки веков.

Хор (очень медленно): Аминь.

Иерей (тихо): Слава в вышних Богу, и на земли мир, в человецех благоволение (трижды).

Господи, устне мои отверзеши, и уста моя возвестят хвалу Твою (трижды).

Да исполнятся уста моя хваления Твоего, Господи, яко да воспою славу Твою, весь день великолепие Твое (трижды).

Затем, поклонившись на обе стороны сослужащим и выйдя на амвон, иерей поет (на 7-й глас): Возвеличите Господа со мною, и вознесем имя Его вкупе.

Хор: Дух Святый найдет на Тя, и сила Вышняго осенит Тя.

Диакон, выйдя северными вратами на амвон, лицом к народу произносит ектению:

Миром Господу помолимся.

Хор: Господи, помилуй.

Обернувшись в святые врата:

Спаси, помилуй, ущедри и сохрани нас, Боже, Твоею благодатию.

Повернувшись к народу:

О свышнем мире и Божием человеколюбии, и спасении душ наших, Господу помолимся.

О мире всего мира и единении всех святых Божиих церквей, Господу помолимся.

О святей вселенстей и апостольстей церкви, еже от конец земли даже до конец ея, Господу помолимся.

О спасении и заступлении святейшаго отца и Архиепископа нашего …, о всем причте и христолюбивых людех, Господу помолимся.

О Президенте нашем …, всей палате и воинстве их, и о еже с небесе помощи и победе, Господу помолимся.

О граде нашем …, всяком граде и стране, и иже в православной вере и благочестии Божии живущих в них, о мире и безмятежии их, Господу помолимся.

О плодоносящих и доброделающих во святых Божиих церквах, и поминающих убогих, вдовиц и сирот, странников и в нужде пребывающих, и о заповедавших нам, яко да поминаем их в молитвах, Господу помолимся.

О еже в старости и немощи сущих, болящих, труждающихся, и от духов нечистых стужаемых, еже от Бога скором исцелении и спасении их, Господу помолимся.

О еже в девстве и чистоте, и подвизе, и в честнем браке пребывающих, и о еже в горах, вертепах и пропастех земных подвизающихся преподобных отцех и братиях, Господу помолимся.

О плавающих, путешествующих, странствующих христианах и о еже в пленении и изгнании, и в темницах и в тяжких работах сущих братиях наших, мирном возвращении каждого в дом свой с радостию, Господу помолимся.

О предстоящих и сомолящихся нам в час сей святый и во всякое время отцев же и братиях, тщании, труде и усердии их, Господу помолимся.

И о всякой душе христианстей, скорбящей и озлобленной, милости Божия и помощи требующей, и о обращении заблудших, здравии болящих, о свобождении плененных, упокоении преждепочивших отец и братий, Господу помолимся.

О оставлении грехов и прощении согрешений наших еже избавитися нам от всякия скорби, гнева, беды и нужды и возстания врагов, Господу помолимся.
Пространнее о благорастворении воздухов, дождех мирных, росах благих, плодов изобилии, совершенном плодородии, и о венце лета, Господу помолимся.

О еже услышану и благоприятну быти молению нашему пред Богом, и ниспослатися нам богатым милостям и щедротам Его, Господу помолимся.
Пресвятую, пречистую, преславную, благословенную Владычицу нашу Богородицу и приснодеву Марию, святаго Иоанна, славнаго пророка, Предтечу и Крестителя, Стефана перводиакона и первомученика, Моисея, Аарона, Илию, Елиссея, Самуила, Давида, Даниила пророков, и вся святыя и праведныя помянем, яко да молитвами и молении их вси помиловани будем.

О предлежащих честных и пренебесных, неизреченных, пречистых, славных, страшных, ужасных, божественных дарех, и о спасении предстоящего и приносящаго сия честнаго отца нашего (имя служащего священника) Господа Бога молим.

Хор: Господи, помилуй (трижды).

Во время ектении иерей молится тайно, склонив голову и простирая руки к св. престолу (если нет диакона, эти молитвы читаются вместо ектении, перед амвоном, среди народа):

Призревший на нас милостью и щедротами, Владыко Господи, и даровавший дерзновение нам смиренным и грешным, и недостойным рабом Твоим предстояти святому Твоему жертвеннику и приносити Тебе страшную сию и безкровную жертву о наших грехах и о людских неведениих, призри на мя, непотребнаго раба Твоего, и изглади моя прегрешения благоутробия ради Твоего, и очисти моя уста и сердце от всякия скверны плоти и духа, и отстави от мене всякий помысл срамный же и неразумный, и удостой мя, силою Всесвятаго Твоего Духа, совершити службу сию, и приими меня ради Твоея благости, приближающагося святому жертвеннику.

И благоволи, Господи, приятным быти приносимым Тебе даром сим руками моими, снисходяще моим немощем, и не отвержи мене от лица Твоего, ниже возгнушайся моего недостоинства, но помилуй мя, Боже, и по множеству щедрот Твоих презри беззакония моя, яко да неосужденно пришед пред славу Твою, сподоблюся покрова Единороднаго Твоего Сына и озарения Всесвятаго Твоего Духа, и не яко раб греха отвержен буду, но яко раб Твой обрету благодать и милость, и оставление грехов в сем и в будущем веке. Ей, Владыко Вседержителю, Всесильне Господи, услыши моление мое: Ты бо еси вся действуяй во всех, и от Тебе вси чаем во всех помощи же и заступления, и от Единороднаго Твоего Сына, и Животворящего Духа, ныне и присно и во веки веков.

Боже, иже многаго ради и неизреченнаго человеколюбия ниспославый Единороднаго Твоего Сына в мир, да заблудшее возвратит овча, не отвратися нас, грешных, вручающих Тебе страшную сию и безкровную жертву. Не бо на правды наша уповаем, но на милость Твою благую, ею же род наш соблюдаеши. И ныне молимся и просим Твою благостыню: да не будет во осуждение людем Твоим устроенное нам сие ко спасению таинство, но во оставление грехов, во обновление душ и телес, во благоугождение Тебе, Богу и Отцу.

Благодарим Тя, Господи Боже наш, яко дал еси нам дерзновение во входе святых, в пути новом и живом через завесу плоти Христа Твоего. Сподобившеся же внити на место селения славы Твоея, внутри же быти завесы и святая святых видети, припадаем благостыни Твоей, Владыко, помилуй нас! Ибо со страхом и трепетом желаем предстати святому Твоему жертвеннику и принести Тебе страшную сию и безкровную жертву о наших согрешениих и о людских неведениих. Ниспосли на нас, Боже, благодать Твою благую и освяти наша души и телеса, и духи, и премени помышления наша ко благочестию, яко да чистою совестию принесем Ти милость, мир, жертву хваления.

После ектении возглас:

Милостию и щедротами Единороднаго Твоего Сына, с Нимже благословен еси, со Пресвятым и Благим, и Животворящим Твоим Духом, ныне и присно и во веки веков.

Хор: Аминь.

Иерей: Мир всем.

Хор: И духови твоему.

Диакон: Станем добре. Станем благочестне. Станем со страхом Божиим и сокрушением. Вонмем: святое возношение в мире Богу.

И входит в алтарь. Певцы поют:

Милость мира, жертву хваления.

Иерей тихо пред престолом: И, открыв тайные покровы знамений, одевающих священнодействие сие, ясно покажи нам, и ума нашего очи неотъемлемы Твоего света исполни и, очистив нищету нашу от всякия скверны плоти и духа, достойны соделай нас страшнаго сего и ужаснаго предстояния, яко преблагоутробен и милостив Бог еси, и Тебе славу возсылаем, Отцу и Сыну и Святому Духу, ныне и присно и во веки веков.

Иерей, выйдя на амвон и благословляя людей:

Любовь Бога и Отца, и благодать Господа и Бога, и Спаса нашего Иисуса Христа, и причастие и дар Всесвятаго Духа да будет со всеми вами.

Хор: И со духом твоим.

Иерей, возвысив руки и очи, возглашает к народу:

Вознесем ум и сердца.

Хор: Вознесем ко Господу.

Иерей, сложив руки на груди кресто-образно, обращаясь к иконе Спасителя:

Благодарим Господа (заходит в алтарь).

Хор: Достойно и праведно.

Иерей, преклонив голову и немного подняв руки, тихо молится:

Воистину достойно и праведно есть, благолепно же и потребно Тя хвалити, Тя пети, Тебе кланятися, Тебе славословити, Тебе благодарити, всякия твари видимыя и невидимыя Содетеля, сокровище вечных благ, источника жизни и безсмертия, всяческих Бога и Владыку. Егоже поют небеса и небеса небес, и вся силы их, солнце же и луна, и весь звездный лик, земля, море и вся яже в них, Иерусалим пренебесный, собор избранных, Церковь перворожденных, написанных на небесех, духи праведных и пророк, души мученик и апостол, ангели, архангели, престоли, господствия, начала же и власти, и силы страшныя, Херувими многоочитии и шестокрилатии Серафимы, иже двема крилама покрывают лица своя, двема же ноги, и двема летающе взывают друг ко другу неусыпными устами, немолчными славословленьми:

Громче: Победную песнь великолепныя Твоея славы, светлым гласом поюще, вопиюще, славословяще, взывающе и глаголюще.

Хор: Свят, Свят, Свят, Господь Саваоф, исполнь небо и земля славы Твоея. Осанна в вышних, благословен грядый во имя Господне. Осанна в вышних.

Иерей: Свят еси (знаменует дискос) Царю веков и всякия святыни Господи и Подателю (знаменует чашу). Свят и Единородный Твой Сын, Господь наш Иисус Христос, Имже вся сотворил еси(знаменует обоя). Свят же и Дух Твой Всесвятый, проникаяй всяческая и глубины твоя, Бога и Отца. Свят еси Всесильне, Страшне, Блаже, Благоутробне, наипаче состраждаяй созданию Твоему. Сотворивый от земли человека по образу Твоему и подобию, и даровавший ему наслаждение райское, преступивша же заповедь Твою и отпадша, сего не презрел еси, ниже оставил еси, Блаже, но наставил еси его яко Благоутробный Отец, призвал еси его через закон, научил еси его через пророки, затем же Самаго Единороднаго Твоего Сына, Господа нашего Иисуса Христа ниспослал еси в мир, да, Сам пришед, Твой обновит и возставит образ. Иже снисшед с небесе и воплощся от Духа Свята и Марии святыя Приснодевы и Богородицы, споживе же человеком, вся устроил ко спасению рода нашего. Хотяще же, Безгрешне, Крестом вольную и животворящую смерть за нас, грешных, прияти в нощь, в которую предан был, паче же Сам Себя предавая за жизнь мира и спасение,

Принимает левой рукой с дискоса святой хлеб и, возвышая его, продолжает:

прием хлеб во святыя и пречистыя, и безсмертныя Своя руки, воззрел на небеса и показал Тебе, Богу и Отцу, благодарив, благословив, освятив,

знаменует святой хлеб правой рукой, берет его крайними пальцами правой руки, немного возвышая

преломив, дал святым Своим и блаженным учеником и апостолом, сказав: ПРИИМИТЕ, ЯДИТЕ, СИЕ ЕСТЬ ТЕЛО МОЕ, ЕЖЕ ЗА ВАС ЛОМИМОЕ И ПРЕДАВАЕМОЕ ВО ОСТАВЛЕНИЕ ГРЕХОВ.

И кладет св. хлеб на дискос.

Хор: Аминь.

Иерей приподнимает левой рукой Святую чашу и произносит:

Также на вечери, прием чашу и растворив от вина и воды, взирая на небеса, показав Тебе, Богу и Отцу, и благодарив, освятив,

Благословляет чашу и приподнимает её правой рукой:

исполнив Духа Святаго, даде святым и блаженным Своим учеником и апостолом, сказав: ПЕЙТЕ ОТ НЕЯ ВСИ, СИЯ ЕСТЬ КРОВЬ МОЯ НОВАГО ЗАВЕТА, ЯЖЕ ЗА ВАС И ЗА МНОГИХ ИЗЛИВАЕМАЯ И ПРЕДАВАЕМАЯ ВО ОСТАВЛЕНИЕ ГРЕХОВ.

Ставит чашу на престол.

Хор: Аминь.

Иерей: Сие творите в мое воспоминание: всякий раз, когда вкушаете хлеб сей и чашу сию пиете, смерть Сына Человеческаго возвещаете и воскресение Его исповедуете в ожидании пришествия Его.

Диакон возглашает в алтаре:

Веруем и исповедуем.

Хор: Смерть Твою, Господи, возвещаем, и воскресение Твое исповедуем.

Иерей снова благословляет дискос и потир и молится (тайно):

Вспоминаем и мы, грешные, животворящие Его страдания, спасительный Крест и смерть, и погребение, и тридневное из мертвых воскресение, и на небеса восхождение, и одесную Тебе Бога и Отца седение, и второе славное, страшное Его пришествие, егда приидет со славою судити живых и мертвых, егда хощет коемуждо воздати по делом его:

Пощади ны, Господи Боже, (трижды) по благоутробию Своему.

Приносим Ти, Владыко, страшную сию и безкровную жертву, моляще, да не по грехом нашим, ниже по беззаконием нашим воздаси нам, но по Твоему снисхождению и неизреченному Твоему человеколюбию презрев и изгладив еже о нас рукописание, Тебе молящихся, подай нам небесныя и вечныя Твоя дарования, ихже око не виде и ухо не слыша, и на сердце человеческое не взыде, яже уготовал еси любящим Тя, и не ради грехов моих отринеши люди Твоя, Человеколюбче Господи.

Воздевая руки, иерей вместе с сослужащими, поёт:

Людие бо Твои и Церковь Твоя молят Тя.

Хор: Помилуй нас, Господи Боже, Отче Вседержителю.

Иерей, преклонив голову, молится:

Помилуй нас, Боже Вседержителю, помилуй нас, Боже Спасителю наш, помилуй нас, Боже, по велицей милости Твоей и ниспосли на нас и на предлежащие дары сия Духа Твоего Всесвятаго, Господа Животворящего, сопрестольнаго Тебе, Богу и Отцу, и Единородному Твоему Сыну, соцарственнаго, Единосущнаго же и совечнаго, глаголавшего законом и пророки и Новым Твоим Заветом, сошедшаго в виде голубине на Господа нашего Иисуса Христа в Иордане реце и пребывающаго на нем, сошедшаго на святыя Твоя апостолы в виде огненных язык в горнице святаго и славнаго Сиона в день святыя Пятидесятницы.

Сего Духа Твоего Всесвятаго ниспосли, Владыко, на нас и на предлежащия святыя дары сия (воздевает руки), да посетив святым и благим и славным Своим наитием, освятит и СОТВОРИТ ХЛЕБ УБО СЕЙ ТЕЛО СВЯТОЕ ХРИСТОВО (благословляет хлеб),

Все: Аминь.

Иерей: И ЧАШУ СИЮ КРОВЬ ЧЕСТНУЮ ХРИСТОВУ (благословляет чашу),

Все: Аминь.

Иерей: Да будет всем иже от них причащающимся во оставление грехов и в жизнь вечную.

Все: Аминь.

Иерей: Во освящение душ и телес.

Все: Аминь.

Иерей: В плодоношение дел благих.

Все: Аминь.

Иерей: Во утверждение святой Твоей соборной и апостольской Церкви, юже основал еси на камене веры, да врата адова не одолеют ей, избавляя ю от всякия ереси и от соблазна делающих беззаконие, сохраняя ю даже до скончания веков (благословляет дискос и чашу).

Все: Аминь.

Иерей: Приносим Ти, Владыко, и о святых Твоих местах, ихже прославил еси богоявлением Христа Твоего и наитием Всесвятаго Твоего Духа, наипаче же о святем славнем Сионе, Матери всех церквей, и о еже по всей вселенней святей Твоей соборней и апостольстей Церкви, богатыя дары Всесвятаго Твоего Духа и ныне подаждь ей, Владыко.

Хор поет тихо, протяжно: Помяни Господи Боже наш.

Иерей тихо молится: Помяни, Господи, и иже в ней святыя отцы наши и епископы, иже во всей вселенней православно правящия слово Твоея истины.

В первых помяни, Господи Боже наш, преподобнаго отца нашего нашего, святейшаго нашего Архиепископа …, старость ему честную подаждь, многолетна его сохрани, пасуща люди Твоя во всяком благочестии и досточестии.

Помяни, Господи, протоиерея … с братией святаго храма сего, еже зде честное пресвитерство и повсюду, еже во Христе диаконство, прочее всякое служение, зде начальствующих, учащих и учащихся, весь церковный чин и еже во Христе братство наше и вся христолюбивыя люди.

Помяни, Господи, всех нас, служащих во святый час сей пред святым Твоим жертвенником, во еже приносити святую и безкровную Твою жертву, и даждь нам слово во отверзение душ наших, во славу и похваление всесвятаго имени Твоего.

Помяни, Господи, по множеству милости Твоея, и мене смиреннаго, и грешнаго, и недостойнаго раба Твоего, и призри на мя милостию и щедротами, и избави, и свободи от гонящих мя, Господи, Господи сил, и не вниди в суд с рабом Твоим, и, понеже умножися во мне грех, да преизобыточествует Твоя благодать.

Помяни, Господи, и святый твой жертвенник окружающия диаконы, подаждь им жительство непорочно, чисто служение их сохрани и на степени лучшие возведи.

Помяни, Господи, град сей …и страну нашу Российскую, и всех в православней вере и благочестии живущих в них, мир и безмятежие их.

Помяни, Господи, Президента нашего …, всю палату и воинство их, и еже с небесе во всяком благом деле помощь и победу их. Коснися оружия и защити, и востани в помощь их, покори им вся враждебныя языки. Устрой их советы, да тихое и мирное житие поживем во всяком благочестии и досточестии.

Помяни, Господи, плавающих, путешествующих, странствующих христиан, в узах и темницах, в пленении и изгнании, в рудах и мучениях, и в горьких работах пребывающих отец и братий наших, мирное возвращение коегождо в дом.

Помяни, Господи, старых и немощных, болящих, дряхлых и от духов нечистых мучимых, от Тебе, Бога, скорое исцеление и спасение их.

Помяни, Господи, всякую душу христианскую, скорбящую и умученную, милости и помощи от Тебе, Бога, требующую, и обращение заблудших.

Помяни, Господи, иже в девстве и соблюдении, и подвизе пребывающия, и иже в горах и вертепех, и пропастех земных подвизающихся отец и братий наших, и иже по местом православных соборы, и иже зде во Христе собор наш.

Помяни, Господи, труждающихся и служащих нам отец же и братий наших, ради имени Твоего святаго.

Помяни, Господи, всех во благое, всех помилуй, Владыко, всех нас примири, умири множество людей Твоих, истреби соблазны, упраздни брани, умири разделения церквей, ересей востания скоро утоли, ниспровергни гордыню народов, вознеси рог христиан православных, Твой мир и Твою любовь подаждь нам, Боже Спасителю наш, упование всех концев земли.

Помяни, Господи, благорастворение воздухов, дожди мирныя, росы благия, плодов изобилие, совершенное плодородие и венец лета благости Твоея, очи бо всех на Тя уповают и Ты даеши пищу во благовремении, отверзаеши Ты руку Твою и исполняеши всяко животно благоволения.

Помяни, Господи, плодоносивших и плодоносящих во святых Божиих церквах, и поминающих убогих, и заповедавших нам поминати их в молитвах.

Еще сподоби помянути, Господи, и приношения сия принесших в днешний день на святый Твой жертвенник, и о нихже кийждо принесе или в помышлении имать, и вмале Тебе прочтенныя.

Помяни, Господи, и родители наша, сродники и други (читаются поминовения о здравии). Сих всех помяни, Господи, ихже помянухом и ихже не помянухом, православныя. Воздаждь им вместо земных небесная, вместо тленных нетленная, вместо временных вечная, по обетованию Христа Твоего, ибо над жизнью и смертью власть имаши.

Еще помянути сподоби, Владыко, и иже от века Тебе благоугодившия по родам, святыя отцы, патриархи, пророки, апостолы, мученики, исповедники, учители, преподобныя и всякий дух праведный, в вере скончавшийся.

Помяни, Господи, архангельский глас, глаголющий: радуйся, Благодатная, Господь с Тобою, благословенна Ты в женах, и благословен плод чрева Твоего, яко Спаса родила еси душ наших.

Изрядно о Пресвятей и Преблагословенней, Пречистей Владычице нашей Богородице и Приснодеве Марии.

Святаго Иоанна, славнаго Пророка, Предтечу и Крестителя, святыя апостолы, святыя пророки и патриархи, и праведныя, святыя мученики и исповедники.

Помяни, Господи Боже, святыя отцы наша и архиепископы и всякую плоть, юже помянухом и юже не помянухом. Тамо их упокой во стране живых, во Царствии Твоем, в наслаждении рая, в недрех Авраама и Исаака, и Иакова — святых отец наших, отнюдуже отбежит болезнь, печаль и воздыхание, идеже присещает свет лица Твоего и просвещает непрестанно.

Скончание же жития нашего христианское и благополучное, и безгрешное в мире устрой, Господи, собирая нас под ноги избранных Твоих, егда хощеши и како хощеши, Едине токмо без стыда и прегрешений, ради Единороднаго Твоего Сына, Господа же и Бога, и Спаса нашего Иисуса Христа, Той бо един есть безгрешен, явивыйся на земли.

Паки помяни, Господи, Отца и Патриарха нашего АЛЕКСИЯ и Архиепископа нашего …, ихже даруй святей Твоей Церкви в мире целых, честных, здравых и долгоденствующих, право правящих слово Твоея истины.

Обратившись к людям, диакон возглашает:

И о мире и благостоянии всего мира и святых Божиих церквей, и о них и за нихже кийждо принесе, или в помышлении имать, и о предстоящих людех, и о всех, и за вся.

Иерей: Даждь и нам, и им, яко благий и Человеколюбец, Владыко.

Хор: Ослаби, остави, прости, Боже, прегрешения наша, вольная же и невольная, яже в ведении и неведении.

Иерей: Благодатию и щедротами, и человеколюбием Христа Твоего, с Нимже благословен и препрославлен еси со Всесвятым и Благим, и Животворящим Твоим Духом, ныне и присно и во веки веков.

Хор: Аминь.

Иерей благословляет народ: Мир всем.

Хор: И духови твоему.

Диакон, на амвоне лицом к людям:

Паки и паки, и непрестанно миром Господу помолимся.

Хор: Господи, помилуй.

О принесенных и освященных, честных, пренебесных, неизреченных, пречистых, славных, страшных, ужасных, божественных дарех, Господу Богу нашему помолимся.

Яко да Господь Бог наш, приняв их во святый и пренебесный, мысленный и духовный Свой жертвенник, в воню благоухания, возниспослет нам божественную благодать и дар Всесвятаго Духа, помолимся.

Соединение веры и причастие Всесвятаго Его и покланяемаго Духа, испросивше сами себе и друг друга, и всю жизнь нашу Христу Богу нашему предадим.

Хор: Тебе, Господи.

Иерей во время ектении молится тайно:

Боже и Отче Господа и Бога, и Спаса нашего Иисуса Христа, великоимените Господи, блаженное естество, независтная благостыня, всяческих Боже и Владыко, Сый благословенный во веки веков, седяй на херувимех и прославляемый от серафим, Емуже предстоят тысящи тысящ и тьмы тем святых ангел и архангел воинства, принесенныя убо тебе дары в воню благоухания приими, ихже освятити и совершити сподобил еси, Блаже, благодатию Христа Твоего и Всесвятаго Твоего Духа. Освяти, Владыко, и наша души и телеса, и духи, и прикоснися помышлений, и испытай совести, и отвержи от нас всякое помышление лукавое, всякий помысл срамный, всякую страсть и похоть постыдную, всякое слово неподобное, всякую зависть, и суемудрие, и лицемерие, всяку лжу, всякое лукавство, всякое искушение житейское, всякое любостяжание, всякое тщеславие, всяко зло, всяку ярость, всякий гнев, всякое злопомнение, всякое оклеветание, всякое сребролюбие и нерадение, всякое движение злое плоти же и духа, чуждое воли святыни Твоея.

Возглас:

И сподоби нас, Владыко Человеколюбче Господи, со дерзновением, неосужденно, чистым сердцем, душею просвещенною, непостыдным лицем, освященными усты смети называти Тебе, иже на небесех святаго Бога, Отцем, и глаголати:

Все поют «Отче наш…»

Иерей молится тайно:

И не введи нас во искушение, Господи, Господи сил, ведый немощь нашу, но избави нас от лукаваго и от дел его, и от всякаго озлобления, и козни того, ради имени Твоего святаго, нареченнаго на нашем смирении.

Возглас:

Яко Твое есть Царство, и сила, и слава, Отца и Сына и Святаго Духа, ныне и присно и во веки веков.

Хор: Аминь.

Иерей благословляет народ: Мир всем.

Хор: И духови твоему.

Диакон: Главы наша ко Господу приклоним.

Хор: Тебе, Господи.

Иерей (тайно): Тебе приклонихом раби Твои, Господи, своя главы пред святым Твоим жертвенником, чая от Тебе богатыя милости. Ниспосли нам, Владыко, благодать и благословение Твое и освяти наша души и телеса, и духи, яко да достойны будем причастниками и участниками быти Твоих Таин во оставление грехов и в жизнь вечную.

Возглас: Ты бо еси покланяемый и препрославленный Бог наш, и Единородный Твой Сын, и Дух Твой Всесвятый, ныне и присно и во веки веков.

Хор: Аминь.

Иерей, обратившись к народу и воздев руки:

И да будет благодать и милость святыя и единосущныя, несозданныя и нераздельныя, и покланяемыя Троицы + со всеми вами.

Хор: И со духом твоим.

Диакон, подняв правую руку с орарем, возглашает к народу:

Со страхом Божиим вонмем.

Иерей поднимает крайними пальцами рук святой хлеб и молится тайно. Во время молитвы в храме, преклонив головы, люди стоят в полном молчании.

Святе, во святых почиваяй, Господи, освяти нас словом Твоея благодати и наитием Всесвятаго Твоего Духа, Ты бо еси рекий, Владыко: святи будете, якоже Аз Свят есмь. Господи Боже наш, непостижимый Боже! Слове, Отцу и Всесвятому Духу единосущный, совечный, нераздельный! Приими чистую песнь во святых Твоих безкровных жертвах с херувимы и серафимы и от мене грешнаго, вопиюща и глаголюща:

Возгласно: СВЯТАЯ СВЯТЫМ.

Хор: Един свят, Един Господь Иисус Христос, во славу Бога Отца со Святым Духом, Емуже слава во веки веков.

Диакон: О спасении и заступлении святейшаго отца и Архиепископа нашего … и протоиерея нашего …, и о всякой душе скорбящей и озлобленней, милости и помощи Божия требующей, и об обращении заблудших, исцелении болящих, освобождении плененных, упокоении преждепочивших отец же и братий, усердно воззовем: Господи, помилуй.

Хор: Господи, помилуй. (12 раз).

Во время ектении иерей благословляет Хлеб и преломляет его на две части:

IС ХС
НI КА

Левую часть (IС НI) кладет обратно на дискос, правую снова преломляет на две части, частицу (КА) кладет на дискос, а частицу (ХС) благословляет и кладет в потир, тихо говоря:

Соединение Пресвятаго Тела и Честныя Крове Господа и Бога, и Спаса нашего Иисуса Христа. Соединися и освятися и совершися во имя Отца и Сына и Святаго Духа.

Затем иерей преломляет (рукой или копием) частицы (IС НI) и (КА) на нужное для всех причастников количество, говоря тихо:

Се Агнец Божий, Сын Отечь, вземляй грехи мира, закланный за мира жизнь и спасение.

Часть святая Христова, исполнена благодати и истины, Отца и Святаго Духа, Емуже слава и держава во веки веков.

После пения хора диакон возглашает к востоку: Господи, благослови.

Иерей, воздев руки:

Господь да благословит нас и неосужденных соблюдет в причащении пречистых Его даров, ныне и присно и во веки веков.

Хор: Аминь.

Диакон снова возглашает к востоку:

Господи, благослови.

Иерей, вливая в потир теплоту:

Господь да благословит нас и сподобит непорочными персты прияти разженный угль и вложити во уста верных во очищение и обновление душ и телес их, ныне и присно и во веки веков.

Хор: Аминь.

Иерей, стоя у престола и обернувшись к людям, возглашает:

Вкусите и видите Христа Господа, разделяемаго и неразделимаго, раздаваемаго верным и неиждиваемаго, во оставление грехов и в жизнь вечную, ныне и присно и во веки веков.

Хор: Аминь.

Диакон к людям:

В мире Христове поем.

И входит в алтарь малыми дверями.

Хор поет причастен: Вкусите и видите, яко Христос Господь. Аллилуия.

Завеса и царские врата закрываются до окончания причащения священнослужителей.

Собравшимся всем священнослужителям у престола, иерей тихо молится:

Владыко Христе Боже наш, небесный Хлебе, пище всего мира! Согреших на небо и пред Тобою, и несмь достоин причаститися святых и пречистых Твоих Таин, но ради благости Твоея и неизреченнаго долготерпения, достойна мя сотвори и неосужденна, непостыдна, причаститися всесвятаго Тела и честныя Крове во оставление грехов моих и в жизнь вечную.

Вливается теплота в чашу.

Иерей причащается святого Тела, говоря:

Тело Христово.

С этими словами причащает и диакона, который отвечает: Аминь.

Затем иерей причащается из чаши, говоря:

Кровь Христова, чаша жизни.

Так причащает и диакона, который отвечает: Аминь.

Иерей и непотребляющий диакон запивают как обычно и умывают уста.

Затем диакон отверзает завесу и врата, и возглашает, стоя у престола:

Господи, благослови.

Иерей: Слава Богу, освятившему и освящающему всех нас.

Диакон, принимая святую Чашу:

Вознесися на небеса, Боже, и по всей земли слава Твоя, и царство Твое пребывает во веки веков.

Иерей: Благословенно имя Господа Бога нашего во веки веков.

Иерей берет дискос со святым Хлебом, диакон выходит во святые двери с чашей, возглашая:

Со страхом Божиим, верою и любовию приступите.

Хор: Благословен грядый во имя Господне. Исполни уста моя хваления, Господи, и радости исполни устне мои, яко да воспою славу Твою.

Диакон становится с чашей у иконы Богородицы, а иерей на амвоне, и причащают отдельно Тела и Крови мирян, говоря то же, что и при причащении священников.

(Возможно причащение лжицей, но с молитвой литургии св. Иакова.)

Люди отвечают: Аминь.

После причастия иерей благословляет дискосом людей, говоря:

Спаси, Боже, люди Твоя и благослови достояние Твое.

Хор: Благодарим Тя, Христе Боже наш, яко сподобил еси нас причаститися Тела и Крове Твоея во оставление грехов и в жизнь вечную, неосужденны ны сохрани, молимся, яко Благ и Человеколюбец.

Иерей и диакон входят в алтарь, ставят на престол сосуды, иерей ссыпает оставшийся святой Хлеб в чашу, вытирает губкой дискос и кадит чашу, тихо молясь:

Возвеселил еси нас, Боже, во единении Твоем, сего ради приносим Тебе песнь благодарения — плод уст, исповедая благодать Твою. С кадилом сим да взыдет молитва наша к Тебе, Боже, и да не возвратится тщетной, но подаждь нам благоухание Всесвятаго Твоего Духа, миро пречистое и неотъемлемое, исполни уста наша хваления и радования, сердце же радости и веселия, во Христе Иисусе Господе нашем, с Нимже благословен еси, со Всесвятым Твоим Духом, ныне и присно и во веки веков.

(Второй) иерей относит сосуды на жертвенник без каждения и молитв.
Антиминс сворачивается (первым) иереем.

Диакон выходит северными вратами и, обращаясь к людям, произносит ектению:

Паки и паки, непрестанно миром Господу помолимся.

Хор: Господи, помилуй.

Яко да будет нам причащение Святынь Его во отвращение всякаго лукаваго деяния, в напутствие жизни вечной, в причащение и дар Святаго Духа, помолимся.

Хор: Господи, помилуй.

Пресвятую, пречистую, преславную, благословенную Владычицу нашу Богородицу и Приснодеву Марию со всеми святыми и праведными помянувше, сами себе и друг друга, и всю жизнь нашу Христу Богу предадим.

Хор: Тебе, Господи.

Иерей (тайно):

Боже, великаго ради и неизреченнаго благоутробия снисшедший к немощи рабов Твоих и сподобивший нас причаститися сей превысшей небес трапезы.
Не осуди нас, Владыко, грешных за причащение пречистых Твоих Таин, но сохрани нас во освящении, яко да достойни бывше Всесвятаго Духа Твоего, обрящем часть и наследие со всеми святыми, от века Тебе благоугодившими, во свете лица Твоего.

Возглас: Яко благословися и святися, и препрославися всечестное и великолепое, и святое имя Твое, ныне и присно и во веки веков.

Хор: Аминь.

Иерей, благословляя народ:Мир всем.

Хор: И духови твоему.

Диакон: Главы наша ко Господу приклоним.

Хор: Тебе, Господи.

Иерей (тайно):

Боже великий и дивный, призри на рабы Твоя, яко Тебе приклонихом главы, и простри руку Твою державную, исполненную благо-словений, и благослови люди Твоя, и сохрани достояние Твое, яко да всегда и непрестанно прославляем Тя, Единаго, живаго и истиннаго Бога нашего, Святую и Единосущную Троицу, Отца и Сына и Святаго Духа.

Возглас: Тебе бо подобает и долженствует от всех нас всякое славословие, честь, поклонение и благодарение, Отцу и Сыну и Святому Духу, ныне и присно и во веки веков.

Хор: Аминь.

Диакон: С миром Христовым изыдем.

Иерей, выйдя из алтаря на середину храма (за амвон), к алтарю читает молитву:

От силы в силу восходяще и всю еже в храме Твоем исполнив божественную службу, Тебе ныне молимся, Господи Боже наш: совершеннаго человеколюбия сподоби нас, исправи путь наш, укорени нас во страхе Твоем, всех помилуй и пренебеснаго Царствия Твоего достойных покажи, во Христе Иисусе Господе нашем, с Нимже подобает Тебе слава, честь, держава, вкупе со Всесвятым Духом, ныне и присно и во веки веков.

Диакон к людям: Отпускаетесь с миром.

Иерей отпуст: Благословен Бог, благословляяй и освящаяй нас причащением святых и пречистых Его Таин, ныне и присно и во веки веков.

Все: Аминь.

Хор поёт Многолетие. Священник после отпуста, осенив напрестольным крестом народ и поцеловав крест, дает его для целования молящимся, а чтец читает благодарственные молитвы. Затем священник опять осеняет крестом народ и возвращается в алтарь. Царские врата и завеса закрываются.

Священник разоблачается, диакон потребляет Дары, и все идут по домам, благодаря Бога.

© 2006, игумен Силуан (Туманов)